|
|
 |
 Haukadalur býður einnig upp á marga möguleika til þess að kynnast betur landinu og náttúru þess.
Í Haukadalsskógi er fjöldi fallegra gönguleiða. Göngustígar eru merktir og þar má finna fróðleiksmola um trjátegundir o.fl. Á veturna er þetta frábært gönguskíðaland! Áður en gengið er inn í skóginn er skilti með upplýsingakorti um helstu leiðir.
Athygli skal vakin á því að í Haukadal er ágætis áningaraðstaða, grill sem öllum er heimilt að nota, borð, bekkir og lítið salernishús.
Árið 1938 fékk Sigurður Greipsson í Haukadal bréf frá Hermanni Jónassyni, þá forsætisráðherra, þar sem hann tjáði Sigurði að danskur maður að nafni Kristian Kirk hefði gefið allmikið fé til skógræktar á Íslandi. Hafi menn í því sambandi fengið augastað á Haukadal ef jörðin væri föl. Sigurður Greipsson var áhugamaður um skógrækt og sá þarna tækifæri til að láta einn af draumum sínum rætast. Hann samþykkti að selja hluta jarðarinnar til skógræktar; 1350 ha, en allt Haukadalsland er talið vera 8500 ha með hjáleigum.
Að kaupunum gerðum var skógræktarstjóra falið að sjá um allar framkvæmdir til friðunar; þar á meðal girðingu umhverfis landið, svo og það að stöðva jarðvegsrof, sem þá var komið fram af brúnum Haukadalsheiðar og niður að skóglendinu. Haukadalur er ekki og hefur aldrei verið þjóðgarður, en sá misskilningur hefur verið lífsseigur.
Minnisvarðar í Haukadal eru sex. Árið 1941 var settur upp minnisvarði um Kristian Kirk. Er það tveggja metra hár stuðlabergsdrangur frá Hrepphólum, með áletraðri eirplötu. Annar er helgaður sendiherra Norðmanna hér á landi á árunum 1945-1958, Torgeir Anderssen-Rysst, sem vann íslenskum skógræktarmálum mikið gagn. Minnisvarði hans, sem er úr gabbrósteini, var reistur 1961. Þá er í skóginum brjóstmynd af Sigurði Greipssyni, gefin af nemendum íþróttaskólans og reist 1972.
Skammt frá minnisvarða Sigurðar Greipssonar er minnisvarði um Hákon Bjarnason fyrrum skógræktarstjóra. Þetta er mikil úrskorin trésúla. Minnisvarðinn var líklega afhjúpaður 1998. Í skóginum er önnur há og mikil úrtskorin trésúla, minnisvarði um Gunnar Freysteinssonm efnilegan skógfræðing sem lést langt um aldur fram. Minnisvarðinn er í lundi í hlíðinni nokkuð norðan Svartagils og neðan Hlíðarvegar. Minnisvarðinn er líklega frá um 1997-1998. Svo er minnisvarði um Greip Sigurðsson á Haukadalsheiði, rétt við línuveginn.
Skógræktin í Haukadal er í dag starfrækt sumarmánuðina þrjá, frá byrjun júní til loka ágúst. Eru starfsmenn hennar í Haukadal þá yfirleitt á bilinu 10-16 manns. |
|
|
|
